100% Val Miñor / 100% Independente

Esta mañá produciuse un incendio nas instalacións da recentemente renovada Praza de Abastos de Baiona. O suceso aconteceu sobre as 9:30 horas, cando unha operaria de limpeza e un electricista municipal viron que o cadro eléctrico comezou a arder. Nun primeiro momento o traballador do concello utilizou un extintor, sen éxito. A Praza foi desaloxada ao igual que todas as vivendas e o hotel da rúa Entrehortas, para evitar posibles intoxicacións polo fume.

Ao lugar desprazáronse a Policía Local de Baiona, a Garda Civil, o GES de Val Miñor e os bombeiros do Porriño. Tamén acudiron técnicos da empresa Unión Fenosa para revisar as instalacións e cortar a subministración eléctrica. Unha vez extinguido o lume, os operarios municipais xa comezaron coa limpeza da zona.

O alcalde de Baiona, Jesús Vázquez Almuíña, informou de que esta tarde manterán unha reunión coa empresa que instalou o cadro, o director de obra e o enxeñeiro que fixo todo o proxecto eléctrico.

Segundo indicou o rexedor o prioritario é buscar unha solución provisional para que os postos da praza poidan traballar, e posteriormente arranxalo de xeito definitivo.

Quedaron afectados o cadro eléctrico e o cableado.